《我阿爹想旅行》影评：张家辉催泪喜剧背后的父女共同梦境与隐藏伏笔

大家好，我系李伟康，今日我想介绍一套电影畀大家，叫做《我阿爹想旅行》。

呢套戏，我已经入戏院睇咗两次，结果两次都喊到收唔到声。你可能会觉得奇怪，张家辉主演嘅，唔系一套喜剧嚟㗎咩？冇错，呢套戏真系好好笑，但我完全冇谂过，原本打算入戏院轻轻松松笑两个钟，最后竟然会畀佢感动成咁。

讲起张家辉，我相信好多同我差唔多年纪嘅观众，应该都仲记得当年嘅化骨龙同埋 流氓师表 里面的张英啦？呢啲年嚟，我哋睇张家辉拍过唔少警匪片、动作片，亦都睇住佢攞影帝。但老实讲，我真系好耐冇睇过佢咁样放开嚟搞笑。

今次佢唔单止揾返当年化骨龙𠮶种有啲无赖、有啲贪玩，但又令人讨厌唔落嘅喜剧感觉，仲特登整咗个地中海发型，完全唔理自己嘅形象。单单系可以再睇到咁样嘅张家辉，我已经觉得张戏飞值回票价。

讲起张家辉，原来《我阿爹想旅行》呢个戏名，系同张家辉当年喺《中华赌侠》入面，恶搞黎明𠮶首《我眼睛想旅行》有关。

导演喺访问入面讲过，既然今次请得张家辉返嚟演喜剧，就梗系要尽量发挥佢嘅价值。所以连套戏个名，都要同佢当年嘅经典搞笑演出扯上关系。

我觉得呢个谂法几过瘾。因为未入戏院之前，单系见到《我阿爹想旅行》呢个戏名，再谂起张家辉当年𠮶种无厘头演出，已经大概知道导演想带畀观众一种点样嘅喜剧感觉。而且睇完整套戏之后，你又会发现，“我阿爹想旅行”呢几个字，其实仲有另一层意思。

不过，《我阿爹想旅行》最令我欣赏嘅，除了用喜剧背后所讲嘅父女故事，同埋两位导演黄绮琳同黄锎，对成个剧本嘅安排。首先讲吓呢套戏嘅故事。

张家辉饰演嘅莫镇强，系一个癌症病人，生命已经去到最后阶段。而钟雪莹饰演嘅女儿莫子珊，就系一个喺电影片场做嘢嘅美术助理。佢每日除咗要应付繁忙嘅工作，仲要抽时间去医院照顾爸爸。

>>偏偏呢个爸爸仲要鬼咁百厌。明明已经病到要住院，仲系成日嘻嘻哈哈，个嘴停唔到，又唔系好肯乖乖听话。有一日，个女因为工作需要，要出去处理片场道具，爸爸就坚持要跟埋佢一齐去。就系咁，原本只系一趟普通嘅工作行程，慢慢变成一场充满意外嘅父女旅行。

故事设定其实好简单，但张家辉真系将呢个爸爸演得好生动。佢有啲贪玩、有啲任性，有时讲嘢仲几乞人憎。个女明明已经为工作很忙，佢仲系不断畀麻烦个女。但奇怪嘅系，你又唔会真系讨厌呢个角色。

钟雪莹嘅演出亦都好重要。佢喺戏入面成日畀爸爸激到唔知点算好，两个人嘅对白好自然，嗌起交上嚟，亦都好似我哋平时生活入面真正嘅父女。尤其系张家辉一本正经咁讲埋啲歪理，个女喺隔篱露出𠮶种又无奈、又吹佢唔胀嘅表情，两个人嘅喜剧节奏真系夹得好好，行内人会看得出他们在 – 斗戏。

如果要我畀《我阿爹想旅行》一个整体评价，我会话，呢套系一部娱乐性好高，而且感情处理得相当好嘅香港电影。佢有我哋熟悉嘅港产片元素，例如武侠片，动作片，赌片，鬼片和喜剧，但人物之间嘅感情又好真实。套戏冇为咗催泪就买橙，亦都冇因为要搞笑，就忽略咗人物嘅感情。

除咗两位主角，电影仲有蒙嘉慧、姜皓文呢啲我哋熟悉嘅演员参与。尤其系蒙嘉慧，我真系好耐冇喺大银幕见过佢。而姜皓文嘅出现，亦都令我谂返起当年嘅《激战》。仲有一样嘢几得意，姜皓文喺电影入面饰演嘅角色叫做“康叔叔”。熟悉我嘅朋友应该都知，我都系康叔叔。所以套戏先啱啱开始，我就已经有一种莫名其妙嘅代入感，好似自己都有份参与呢趟旅行咁。

戏入面仲有其他几有意思嘅客串同致敬，熟悉香港电影嘅观众，应该会揾到唔少乐趣。呢套电影仲有一个值得介绍嘅制作背景。佢获得香港电影发展基金“薪火相传计划”嘅支持，由资深电影人张婉婷担任监制，黄绮琳同黄锎联合执导。黄绮琳之前拍过《金都》《填词L》，今次就将一个带有个人感情嘅故事，拍成一套面向大众嘅商业喜剧。

所以，如果你仲未睇过《我阿爹想旅行》，我认为呢套戏真系非常值得买飞入场。尤其系钟意张家辉、钟意香港喜剧，或者想睇一套有笑有泪嘅亲情电影嘅观众，我相信你唔会失望。

不过，跟住落嚟，我就要开始深入讨论呢套电影嘅剧情，包括佢最重要嘅结局，同埋一啲隐藏嘅伏笔。

所以我要先提醒大家，由呢度开始，会有非常严重嘅剧透。

如果你仲未睇过呢套戏，而且打算入戏院，我强烈建议你暂时停喺呢度。等睇完电影之后，再返嚟听我跟住落嚟嘅分析。

好，如果你已经睇过，或者唔介意畀人剧透，咁我哋就继续。

>《我阿爹想旅行》最大嘅反转，就系我哋一直以为真实发生嘅父女旅行，原来只系一场梦。

当电影最后返到医院，我先突然明白，点解之前咁多睇落唔合理嘅情节，竟然全部都可以发生。莫镇强明明系一个病情严重嘅癌症病人，竟然可以跟住个女周围去，仲由香港去到澳门，再去日本冲绳。

第一次睇完，我以为呢场只系莫镇强临终前发嘅一场梦。但系我太太睇完之后，问咗我一个问题，当时我真系答佢唔到。

佢话，如果成段旅行只系莫镇强一个人发梦，点解电影入面会穿插个女细个时候嘅回忆？而且有啲回忆，系得个女自己先知道，爸爸根本冇可能知道。

所以第二次入戏院，我就特别留意呢场梦究竟由几时开始，同埋电影有冇留下其他线索。结果我发现，导演其实一早就将梦境嘅起点话咗畀我哋知。

喺医院入面，个女陪住爸爸一齐瞓觉。个女话，第二日仲要去片场跟场，爸爸就同佢讲：“唔好谂咁多啦，瞓啦。”

跟住两个人就一齐瞓著咗。重新睇返呢一幕，你就会发现，现实同梦境嘅分界，其实就藏喺呢句好普通嘅父女对白入面。

但更加有意思嘅系，呢场梦唔只系莫镇强一个人发嘅，而系爸爸同个女一齐发嘅梦。点解我会咁谂？除咗我太太提出嘅童年回忆之外，我仲揾到三个值得讨论嘅线索。

第一个，就系𠮶个大碗。电影入面，个女因为片场工作，需要去道具场攞一个大汤碗。呢件事成为成段旅行嘅起点。

但问题嚟喇，按照电影呈现嘅情节，爸爸喺瞓觉之前，根本唔知道个女第二日要去攞呢个碗。咁如果只系爸爸自己发梦，佢又点会梦到个女嘅工作安排呢？

而且呢个碗仲有另一层意思。系电影戏中戏入面《孟婆传》用嘅孟婆汤碗。按照民间传说，人死咗之后饮孟婆汤，就会忘记前世嘅记忆。所以我觉得，一个象征死亡同遗忘嘅道具，竟然成为父女最后一趟旅行嘅起点，呢个安排几有意思。

第二个线索，就系洪金宝嘅客串。喺梦境入面，莫镇强曾经向个女展示一招叫做“拍苍蝇”嘅武术招数，话呢招系洪金宝以前教一班临时演员嘅。去到电影最后，爸爸已经过咗身，个女却喺片场真系遇到洪金宝。

佢主动问洪金宝，有冇教过一班临演“拍苍蝇”呢招，而洪金宝亦都真系示范畀佢睇。呢一幕除咗证明爸爸以前同个女讲嘅故事，唔系全部都系吹水之外，仲带出另一个问题。

如果“拍苍蝇”呢件事只系喺爸爸嘅梦入面出现，点解个女醒咗之后，仲会知道呢招，甚至可以向洪金宝求证？

第三个线索，我觉得更加关键，就系戏入面嘅“糖水”。莫镇强因为癌症承受好大痛楚，但佢一直抗拒用吗啡，因为佢担心一打咗吗啡，可能一瞓就再醒唔返。

电影入面，王医生同佢有一个约定，就系将吗啡叫做“糖水”。

所以喺梦境入面，当有个服务员一朝早端糖水畀佢𠮶阵，佢先会有咁大反应。

第一次睇，我哋可能只系觉得张家辉个反应好好笑。但知道糖水呢个暗号之后，呢一幕就有另一种意思。

去到醒返，同个女讲，系时候饮糖水喇。而个女竟然即刻明白，爸爸讲紧嘅系吗啡。问题就喺呢度。如果呢个暗号系喺梦入面先话畀个女知，咁点解醒咗之后，佢都知道呢？

当然，我哋唔可以完全排除电影有啲对话冇拍出嚟。但当大碗、拍苍蝇、糖水暗号，再加埋个女自己童年嘅回忆，全部放埋一齐，我就越嚟越倾向相信，呢个可能系一场父女共同经历嘅梦。

导演冇亲口确认呢个解读，所以我都唔会话呢个就系唯一正确嘅答案。

但如果呢个解读成立，就代表爸爸同个女喺最后一个晚上，一齐经历咗一趟现实入面已经冇机会完成嘅旅行。

而电影仲有另一个贯穿全场，非常精彩嘅设计，就系莫镇强生前最后买落𠮶张马票。

如果你有留意𠮶六匹马嘅名，就会发现，佢哋竟然对应晒梦境入面嘅重要情节。

第一只叫“开工大吉”，对应爸爸陪个女开工。第二匹“靓牌王”，对应喺澳门赌场赢钱。第三匹“力拔山河”，就系佢哋喺日本参加嘅拔河祭。第四匹“心想事成”，亦都系戏入面不断出现𠮶句“连赢三局，心想事成”。第五匹“大闪钻”，对应爸爸喺梦入面补送畀太太嘅求婚钻戒。第六匹“旅行达人”，咪就系成场父女旅行囉？

呢个安排，我真系觉得导演好犀利。

因为我哋可以反过嚟理解，唔系梦入面发生嘅事情，最后咁啱出现喺马票上面。

而系爸爸喺瞓觉之前，已经知道咗呢六匹马嘅名，所以呢啲资讯留咗喺佢记忆入面，再同佢自己嘅愿望、个女嘅生活，同埋熟悉嘅人物混埋一齐，形成咗呢场梦。

呢个就好似我哋平时讲嘅“日有所思，夜有所梦”。

而且喺旅途中，王医生同何姑娘嘅样，仲不断以唔同身分出现，亦都符合梦境将熟悉嘅人物重新组合嘅特征。

所以第二次睇呢套戏，我已经唔系净系跟住剧情笑，而系不断揾紧第一次睇𠮶阵忽略咗嘅细节。不过，所有伏笔入面，真正令我最难受嘅，仲系最后𠮶张马票。

爸爸生前最后一次下注，买咗500蚊，结果中咗孖T，赢咗二十几万港纸。

如果呢套系一部普通喜剧，比如富贵逼人，咁样嘅结局可能会令观众拍晒手掌。但导演偏偏安排喺爸爸离世之后，先畀个女发现呢件事。

我最顶唔顺嘅，就系佢望住身边𠮶个空咗嘅车位，𠮶种好想同爸爸分享，但已经冇办法再分享嘅感觉。

当佢多谢爸爸留低咗咁多嘢畀佢，我相信好多观众都会明白，佢讲紧嘅，已经唔止系𠮶二十几万港纸。

讲到呢度，我谂大家应该明白，点解我会咁钟意《我阿爹想旅行》。张家辉嘅喜剧演出、钟雪莹自然嘅表现，再加埋导演安排嘅呢啲伏笔，令佢成为一套既好睇，又值得重新睇多次嘅电影。

至于我提出嘅父女共同梦境呢个解读，你又认唔认同呢？

可能你有完全唔同嘅睇法，或者你喺电影入面发现咗其他我忽略咗嘅线索。欢迎喺留言区同我分享。尤其系一啲你觉得最感动，或者最有意思嘅情节，我真系好想知道大家系点样理解嘅。

好啦，今日条片就分享到呢度，如果你觉得这部片OK的话，请给Like,留言和分享，让更多知道这部电影，我系李伟康，多谢大家收睇，我哋下条片再见！