《我阿爹想旅行》影評：張家輝催淚喜劇背後的父女共同夢境與隱藏伏筆

大家好，我係李偉康，今日我想介紹一套電影畀大家，叫做《我阿爹想旅行》。

呢套戲，我已經入戲院睇咗兩次，結果兩次都喊到收唔到聲。你可能會覺得奇怪，張家輝主演嘅，唔係一套喜劇嚟㗎咩？冇錯，呢套戲真係好好笑，但我完全冇諗過，原本打算入戲院輕輕鬆鬆笑兩個鐘，最後竟然會畀佢感動成咁。

講起張家輝，我相信好多同我差唔多年紀嘅觀眾，應該都仲記得當年嘅化骨龍同埋 流氓師表 裡面的張英啦？呢啲年嚟，我哋睇張家輝拍過唔少警匪片、動作片，亦都睇住佢攞影帝。但老實講，我真係好耐冇睇過佢咁樣放開嚟搞笑。

今次佢唔單止搵返當年化骨龍嗰種有啲無賴、有啲貪玩，但又令人討厭唔落嘅喜劇感覺，仲特登整咗個地中海髮型，完全唔理自己嘅形象。單單係可以再睇到咁樣嘅張家輝，我已經覺得張戲飛值回票價。

講起張家輝，原來《我阿爹想旅行》呢個戲名，係同張家輝當年喺《中華賭俠》入面，惡搞黎明嗰首《我眼睛想旅行》有關。

導演喺訪問入面講過，既然今次請得張家輝返嚟演喜劇，就梗係要盡量發揮佢嘅價值。所以連套戲個名，都要同佢當年嘅經典搞笑演出扯上關係。

我覺得呢個諗法幾過癮。因為未入戲院之前，單係見到《我阿爹想旅行》呢個戲名，再諗起張家輝當年嗰種無厘頭演出，已經大概知道導演想帶畀觀眾一種點樣嘅喜劇感覺。而且睇完整套戲之後，你又會發現，「我阿爹想旅行」呢幾個字，其實仲有另一層意思。

不過，《我阿爹想旅行》最令我欣賞嘅，除了用喜劇背後所講嘅父女故事，同埋兩位導演黃綺琳同黃鐦，對成個劇本嘅安排。首先講吓呢套戲嘅故事。

張家輝飾演嘅莫鎮強，係一個癌症病人，生命已經去到最後階段。而鍾雪瑩飾演嘅女兒莫子珊，就係一個喺電影片場做嘢嘅美術助理。佢每日除咗要應付繁忙嘅工作，仲要抽時間去醫院照顧爸爸。

>>偏偏呢個爸爸仲要鬼咁百厭。明明已經病到要住院，仲係成日嘻嘻哈哈，個嘴停唔到，又唔係好肯乖乖聽話。有一日，個女因為工作需要，要出去處理片場道具，爸爸就堅持要跟埋佢一齊去。就係咁，原本只係一趟普通嘅工作行程，慢慢變成一場充滿意外嘅父女旅行。

故事設定其實好簡單，但張家輝真係將呢個爸爸演得好生動。佢有啲貪玩、有啲任性，有時講嘢仲幾乞人憎。個女明明已經爲工作很忙，佢仲係不斷畀麻煩個女。但奇怪嘅係，你又唔會真係討厭呢個角色。

鍾雪瑩嘅演出亦都好重要。佢喺戲入面成日畀爸爸激到唔知點算好，兩個人嘅對白好自然，嗌起交上嚟，亦都好似我哋平時生活入面真正嘅父女。尤其係張家輝一本正經咁講埋啲歪理，個女喺隔籬露出嗰種又無奈、又吹佢唔脹嘅表情，兩個人嘅喜劇節奏真係夾得好好，行內人會看得出他們在 – 鬥戲。

如果要我畀《我阿爹想旅行》一個整體評價，我會話，呢套係一部娛樂性好高，而且感情處理得相當好嘅香港電影。佢有我哋熟悉嘅港產片元素，例如武俠片，動作片，賭片，鬼片和喜劇，但人物之間嘅感情又好真實。套戲冇為咗催淚就買橙，亦都冇因為要搞笑，就忽略咗人物嘅感情。

除咗兩位主角，電影仲有蒙嘉慧、姜皓文呢啲我哋熟悉嘅演員參與。尤其係蒙嘉慧，我真係好耐冇喺大銀幕見過佢。而姜皓文嘅出現，亦都令我諗返起當年嘅《激戰》。仲有一樣嘢幾得意，姜皓文喺電影入面飾演嘅角色叫做「康叔叔」。熟悉我嘅朋友應該都知，我都係康叔叔。所以套戲先啱啱開始，我就已經有一種莫名其妙嘅代入感，好似自己都有份參與呢趟旅行咁。

戲入面仲有其他幾有意思嘅客串同致敬，熟悉香港電影嘅觀眾，應該會搵到唔少樂趣。呢套電影仲有一個值得介紹嘅製作背景。佢獲得香港電影發展基金「薪火相傳計劃」嘅支持，由資深電影人張婉婷擔任監製，黃綺琳同黃鐦聯合執導。黃綺琳之前拍過《金都》《填詞L》，今次就將一個帶有個人感情嘅故事，拍成一套面向大眾嘅商業喜劇。

所以，如果你仲未睇過《我阿爹想旅行》，我認為呢套戲真係非常值得買飛入場。尤其係鍾意張家輝、鍾意香港喜劇，或者想睇一套有笑有淚嘅親情電影嘅觀眾，我相信你唔會失望。

不過，跟住落嚟，我就要開始深入討論呢套電影嘅劇情，包括佢最重要嘅結局，同埋一啲隱藏嘅伏筆。

所以我要先提醒大家，由呢度開始，會有非常嚴重嘅劇透。

如果你仲未睇過呢套戲，而且打算入戲院，我強烈建議你暫時停喺呢度。等睇完電影之後，再返嚟聽我跟住落嚟嘅分析。

好，如果你已經睇過，或者唔介意畀人劇透，咁我哋就繼續。

>《我阿爹想旅行》最大嘅反轉，就係我哋一直以為真實發生嘅父女旅行，原來只係一場夢。

當電影最後返到醫院，我先突然明白，點解之前咁多睇落唔合理嘅情節，竟然全部都可以發生。莫鎮強明明係一個病情嚴重嘅癌症病人，竟然可以跟住個女周圍去，仲由香港去到澳門，再去日本沖繩。

第一次睇完，我以為呢場只係莫鎮強臨終前發嘅一場夢。但係我太太睇完之後，問咗我一個問題，當時我真係答佢唔到。

佢話，如果成段旅行只係莫鎮強一個人發夢，點解電影入面會穿插個女細個時候嘅回憶？而且有啲回憶，係得個女自己先知道，爸爸根本冇可能知道。

所以第二次入戲院，我就特別留意呢場夢究竟由幾時開始，同埋電影有冇留下其他線索。結果我發現，導演其實一早就將夢境嘅起點話咗畀我哋知。

喺醫院入面，個女陪住爸爸一齊瞓覺。個女話，第二日仲要去片場跟場，爸爸就同佢講：「唔好諗咁多啦，瞓啦。」

跟住兩個人就一齊瞓著咗。重新睇返呢一幕，你就會發現，現實同夢境嘅分界，其實就藏喺呢句好普通嘅父女對白入面。

但更加有意思嘅係，呢場夢唔只係莫鎮強一個人發嘅，而係爸爸同個女一齊發嘅夢。點解我會咁諗？除咗我太太提出嘅童年回憶之外，我仲搵到三個值得討論嘅線索。

第一個，就係嗰個大碗。電影入面，個女因為片場工作，需要去道具場攞一個大湯碗。呢件事成為成段旅行嘅起點。

但問題嚟喇，按照電影呈現嘅情節，爸爸喺瞓覺之前，根本唔知道個女第二日要去攞呢個碗。咁如果只係爸爸自己發夢，佢又點會夢到個女嘅工作安排呢？

而且呢個碗仲有另一層意思。係電影戲中戲入面《孟婆傳》用嘅孟婆湯碗。按照民間傳說，人死咗之後飲孟婆湯，就會忘記前世嘅記憶。所以我覺得，一個象徵死亡同遺忘嘅道具，竟然成為父女最後一趟旅行嘅起點，呢個安排幾有意思。

第二個線索，就係洪金寶嘅客串。喺夢境入面，莫鎮強曾經向個女展示一招叫做「拍蒼蠅」嘅武術招數，話呢招係洪金寶以前教一班臨時演員嘅。去到電影最後，爸爸已經過咗身，個女卻喺片場真係遇到洪金寶。

佢主動問洪金寶，有冇教過一班臨演「拍蒼蠅」呢招，而洪金寶亦都真係示範畀佢睇。呢一幕除咗證明爸爸以前同個女講嘅故事，唔係全部都係吹水之外，仲帶出另一個問題。

如果「拍蒼蠅」呢件事只係喺爸爸嘅夢入面出現，點解個女醒咗之後，仲會知道呢招，甚至可以向洪金寶求證？

第三個線索，我覺得更加關鍵，就係戲入面嘅「糖水」。莫鎮強因為癌症承受好大痛楚，但佢一直抗拒用嗎啡，因為佢擔心一打咗嗎啡，可能一瞓就再醒唔返。

電影入面，王醫生同佢有一個約定，就係將嗎啡叫做「糖水」。

所以喺夢境入面，當有個服務員一朝早端糖水畀佢嗰陣，佢先會有咁大反應。

第一次睇，我哋可能只係覺得張家輝個反應好好笑。但知道糖水呢個暗號之後，呢一幕就有另一種意思。

去到醒返，同個女講，係時候飲糖水喇。而個女竟然即刻明白，爸爸講緊嘅係嗎啡。問題就喺呢度。如果呢個暗號係喺夢入面先話畀個女知，咁點解醒咗之後，佢都知道呢？

當然，我哋唔可以完全排除電影有啲對話冇拍出嚟。但當大碗、拍蒼蠅、糖水暗號，再加埋個女自己童年嘅回憶，全部放埋一齊，我就越嚟越傾向相信，呢個可能係一場父女共同經歷嘅夢。

導演冇親口確認呢個解讀，所以我都唔會話呢個就係唯一正確嘅答案。

但如果呢個解讀成立，就代表爸爸同個女喺最後一個晚上，一齊經歷咗一趟現實入面已經冇機會完成嘅旅行。

而電影仲有另一個貫穿全場，非常精彩嘅設計，就係莫鎮強生前最後買落嗰張馬票。

如果你有留意嗰六匹馬嘅名，就會發現，佢哋竟然對應晒夢境入面嘅重要情節。

第一隻叫「開工大吉」，對應爸爸陪個女開工。第二匹「靚牌王」，對應喺澳門賭場贏錢。第三匹「力拔山河」，就係佢哋喺日本參加嘅拔河祭。第四匹「心想事成」，亦都係戲入面不斷出現嗰句「連贏三局，心想事成」。第五匹「大閃鑽」，對應爸爸喺夢入面補送畀太太嘅求婚鑽戒。第六匹「旅行達人」，咪就係成場父女旅行囉？

呢個安排，我真係覺得導演好犀利。

因為我哋可以反過嚟理解，唔係夢入面發生嘅事情，最後咁啱出現喺馬票上面。

而係爸爸喺瞓覺之前，已經知道咗呢六匹馬嘅名，所以呢啲資訊留咗喺佢記憶入面，再同佢自己嘅願望、個女嘅生活，同埋熟悉嘅人物混埋一齊，形成咗呢場夢。

呢個就好似我哋平時講嘅「日有所思，夜有所夢」。

而且喺旅途中，王醫生同何姑娘嘅樣，仲不斷以唔同身分出現，亦都符合夢境將熟悉嘅人物重新組合嘅特徵。

所以第二次睇呢套戲，我已經唔係淨係跟住劇情笑，而係不斷搵緊第一次睇嗰陣忽略咗嘅細節。不過，所有伏筆入面，真正令我最難受嘅，仲係最後嗰張馬票。

爸爸生前最後一次下注，買咗500蚊，結果中咗孖T，贏咗二十幾萬港紙。

如果呢套係一部普通喜劇，比如富貴逼人，咁樣嘅結局可能會令觀眾拍晒手掌。但導演偏偏安排喺爸爸離世之後，先畀個女發現呢件事。

我最頂唔順嘅，就係佢望住身邊嗰個空咗嘅車位，嗰種好想同爸爸分享，但已經冇辦法再分享嘅感覺。

當佢多謝爸爸留低咗咁多嘢畀佢，我相信好多觀眾都會明白，佢講緊嘅，已經唔止係嗰二十幾萬港紙。

講到呢度，我諗大家應該明白，點解我會咁鍾意《我阿爹想旅行》。張家輝嘅喜劇演出、鍾雪瑩自然嘅表現，再加埋導演安排嘅呢啲伏筆，令佢成為一套既好睇，又值得重新睇多次嘅電影。

至於我提出嘅父女共同夢境呢個解讀，你又認唔認同呢？

可能你有完全唔同嘅睇法，或者你喺電影入面發現咗其他我忽略咗嘅線索。歡迎喺留言區同我分享。尤其係一啲你覺得最感動，或者最有意思嘅情節，我真係好想知道大家係點樣理解嘅。

好啦，今日條片就分享到呢度，如果你覺得這部片OK的話，請給Like,留言和分享，讓更多知道這部電影，我係李偉康，多謝大家收睇，我哋下條片再見！